本來打算寫眼霜分享文，已經影左相起左標題，但尋日出街行街，買到一大袋，真係忍唔住要即刻分享下！
購物真係帶比女人好多樂趣，快樂指數直線上升，尤其響而家到到都sale既時候，真係平平平，唔需要再買淘寶了！係時候買返D高品質可以耐穿既衣物！
而家逢假期可以唔駛早起，即使我醒左都好，都攤響張床度上下網睇下韓劇，而尋日朝早成朝都響度睇asos.com，因為final sale, 所有野再extra 15% off, 睇岩件french collection 褸、nike 褸同大量飾物，唸住下午出街行下順便夾下價，睇下asos係咪真係平D，就係咁由網上購物變成實地購物！
呢張相有D怪，咩都有，檸檬都有！！！哈哈
先講下檸檬先，係行過有間賣乾果的鋪，佢地係自製風乾生果，例如萍果、香蕉之類，連檸檬都有，但檸檬唔係就咁食，係可以加入水到，一樣有酸味同vitamin c，買左呢包乾檸檬就可以日日都有檸檬水飲喇！唔駛每次切完2片檸檬之後個檸檬唔知點算，不錯不錯！
另外買了2個飾物，一條係響誠品買既dienes silver，呢個牌子響台灣係好出名既，價錢同tiffany差不多，但我自己就覺得質素比tiffany更好，我戴tiffany D銀容易花同變黑，dienes賣意大利銀，我戴好耐都無變呢！
另一個係collect point既耳環，大大隻"happy"吊響度，好代表我心情，價錢仲好平，只要$49!
跟住就去左french collection睇大褸，之前已經行過collect point，collect point都係final sale, 但明顯佢D褸質地比較差，放左一季D衫已經起曬毛頭又甩曬線之類，真係揀唔落手，入到french collection就睇到分別。當然french collection D款比較成熟，只岩返工，但亦因返工所以質素好既，款式classic既就可以有排著。
睇中2件褸，由2千幾減至$899，到比錢時先知，買3件會額外8折，買4件會額外7折！！！即係一件大褸只需$630！
第一件係粉白色，暗扣的，有少少娃娃cutting，款式係classic款，著多幾年都無問題，成分：70% wool，仲有10%茄士咩！我都好耐無買過一件衫係一條線腳都無，通常響淘寶買野都要由頭到尾檢查一次。
第二件實物係靚好多架，手機影相完全影唔到靚既一面，成分都係羊毛，所以係暗藍色，一樣都係classic款，亦一樣係2千幾減到899再減到$630！抵到爛！
另外仲買左2個衛衣，一件兔毛衫，不過要調貨遲D先有！
總共買左5件衫埋單$2400，買得超抵超開心！
留言列表
